Նախագիծը Հայաստանի բնակչության շրջանակներում մեծ արձագանք ստացավ։ Մի քանի ամսվա ընթացքում մեզ պաշտոնապես (առցանց հայտով) դիմեցին շուրջ 50 հազար ընտանիքներ, որոնցից որպես շահառուներ այս պահին առանձնացված են 1400-ը։ Էկոավանում նախատեսվում է կառուցելու 1500 բնակարան։ Ակնհայտ է, որ նախագիծը ոչ թե ներդրումային ուռճացված արժեքով գույք է, այլ կոնկրետ բնակարանային խնդիր լուծող ծրագիր, իսկ ապագա շահառուները ձեռք են բերում բնակարան, որտեղ ապրելու են։ 

2024 թվականի հունիսին նախագիծը ներկայացրել ենք Աշտարակի համայնքապետարան հողատարածքի կարգավիճակի փոփոխության համար։ Բնակավայրի գլխավոր հատակագծի փոփոխության քաղաքաշինական առաջարկությունների վերաբերյալ պատաասխանատու բոլոր գերատեսչություններից միայն ՀՀ Կադաստրի կոմիտեն է առարկություն հայտնել, այսպես՝

«Քննարկվող հողամասերը գտնվում են գյուղատնտեսական նպատակային նշանակության հողամասերի գոտում և այլ նպատակային նշանակությամբ օգտագործելու դեպքում կարող են խոչընդոտ հանդիսանալ գյուղատնտեսական հողերի արդյունավետ օգտագործման համար, ինչը կհակասի նաև ՀՀ կառավարության 2020 թվականի հունվարի 23-ի «Գյուղատնտեսական նշանակության հողերի օգտագործման արդյունավետության բարձրացման հայեցակարգը և միջոցառումների ծրագիրը հաստատելու մասին» N 68-Լ որոշման դրույթներին: Ելնելով վերոգրյալից՝ նպատակային նշանակության փոփոխությունը համարում ենք ոչ նպատակահարմար։»

ՀՀ Կադաստրի կոմիտեի ղեկավար, գրություն, ՍԹ/16976-2024

Այս պատասխանն անհիմն է, քանի որ ՀՀ կառավարությունը հարակից գոտում իրականացնելու է խոշորածավալ կառուցապատման աշխատանքներ։ Մենք  հատուկ պարզաբանում ենք ներկայացրել, որ իրականացվելիք նախագիծը սոցիալական բնակարանաշինության ծրագիր է, որը ՀՀ բնակչության շրջանում մեծ պահանջարկ ունի։

Կադաստրի կոմիտեի ներկայացուցիչները հասկացան, որ իրենց պատասխանն անհիմն է և երկրորդ անգամ արդեն մերժման այլ հիմնավորում տվեցին, այսպես՝ 

«․․․ Կադաստրի կոմինտեն իր դիրքորոշումը տրամադրել է 2024թ․ հոկտեմբերի 16-ի N ՍԹ/16976-2024 գրությամբ։ Միաժամանակ առաջարկում ենք հողամասի նպատակային նշանակության փոփոխությանն անդրադառնալ «Ակադեմիական քաղաք»-ի գլխավոր հատակագծի հաստատման գործընթացի ավարտից հետո։»

ՀՀ Կադաստրի կոմիտեի ղեկավար, գրություն N ՍԹ/20846-2024

Նշենք նաև, որ «Ակադեմիական քաղաք»-ի գլխավոր հատակագիծը հստակ էր դեռ 2024 թվականի առաջին կեսից (Ակադեմիական քաղաքի գլխավոր հատակագծի հայեցակարգը պատրաստ է — https://escs.am/am/news/23362), այսինքն Կադաստրի կոմիտեի այս փաստարկն ուղղակի ժամանակի անհիմն ձգձգում է, սակայն հաշվի առեք, որ մեր շահառուների զգալի մեծամասնությունը վարձով է բնակվում և իրենց բնակարանների հարցի օր առաջ լուծումը հույժ կարևոր սոցիալական նշանակություն ունի։